وقف وسط الميدان وقاللى
القصيدة دى بتاعتى
وانت يابنى سرقها منى
يانهار اسود القصيدة دى بتاعتك؟
قاللى ايوة
زاد من بجاحته وقام وقال
ممكن اطلع اقول مقاطع م القصيدة
وتحت ضغط الموجودين ورغم نظرات التحدى
قلت له ممكن تقول
طلع وفال فعلا مقاطع م القصيدة
وكان حفظها زى اسمه ابن العنيدة
خلى اللى قاعدين كلهم
قالوا حتما القصيدة دى بتاعته
رقصت الدنيا فى عنيا
رقصة من " سالومى " جديدة
ولقيت " يوحنا المعمدان " واقف بيبكى فى الميدان
و محوطاه شلة كبيرة من الديابة وم اللئام
كلهم قاصدين رقبته ،كلهم قاصدين حياته
و مخبيين تحت الحزام سكاكين بتلمع
وهو بيردد يقول " لايحل لك ان تتزوج زوجة لها بعل " .. " لا يحل لك " .
و ما بين " يوحنا " و " سالومى "
وقفت الأحداث تدمع
دخلت ولية رافعة صوتها وقالعة راسها
تقول حوشونى يا مؤمنين
الست دى بتسرق ابنى ،الست دى بتخطف ضنايا
وبين ايديها واد صغير كان ضحية
والدموع من بين عيونها رايحة جاية
والمشهد ازداد ارتباك
قالوا اللى قاعدين كلهم : يا حرام
وبصوا للست اللى شيلة الطفل طبعا بإحترام
ونالت الست اللى واقفة جنبهم كل احتقار
صبوا عليها لعنهم
ودخلوها وهى واقفة النار
وهى م الدهشة شريدة
غريبة والموقف غريب
يبقى ابنها و واحدة تانية تدعى انه ابنها
وماكانش فيه تحاليل تبين وقتها
وماكانش فيه شهادات ميلاد
بس المؤكد انى اللى موجود وقتها - جوا القلوب - كان السواد
وقال سليمان الحكيم :
إلىَّّّ بسيف ايها الحرس .
كل اللى موجود فى الميدان فجأة انخرس
ـــــــــــــــــــــــــــــــــــــــــــــــــــــــــ
التصنيفات : غير مصنف |
